සංවර්ධන කටයුතුවලදී ගොඩනැගිලි සැලසුම් අනුමත කිරීමේදී එක් එක් භූමි ප්‍රමාණය තුල අවසර දෙනු ලබන උපරිම ගෙබිම් ප්‍රමාණය පරිච්ඡේද - 2 හි සැලසුම් හා ගොඩනැගිලි රෙගුලාසි තුල දක්වා ඇත.

සංවර්ධන කටයුතු සඳහා අනුමැතිය ලබාදෙන මුළු ගෙබිම් ප්‍රමාණය තීරණය කිරීමේදී ගැටළු පැන නැගෙන අවස්ථාවල ඒ සම්බන්ධයෙන් අවසන් තීරණය ලබාදීම නාගරික සංවර්ධන අධිකාරිය සතුවේ. 

කිසියම් සංවර්ධන කටයුත්තකට බිම් කොටසක් සඳහා අනුමැතිය ලබාදීමේදී කලාපීකරණ රෙගුලාසි තුළ  විශේෂයෙන් අවම බිම් ප්‍රමාණය සඳහන් කර නොමැති අවස්ථාවල බිම් කොටසක අවම බිම් ප්‍රමාණය පර්චස් 6 ක් විය යුතුය.  එසේ වුවද, එම ප්‍රදේශය තුල නල ජල පහසුකම්  නොමැති නම්, අනුමැතිය සලකා බැලීම සඳහා අවම වශයෙන් පර්චස් 10 ක් තිබිය යුතුය.

පාසැල් හා රෝහල් සඳහා බිම් කට්ටි ආවරණය උපරිම 50% ක් විය යුතුය.

යම්කිසි විශේෂිත භාවිතයක් සඳහා අගනගර සංවර්ධන සැලැස්මෙහි ඇති බිම් කොටසක් සහ සෑම දේපළක්ම නිශ්චිත භාවිතයක් සඳහා වෙන්කර ඇති තැන්හි, එසේ වෙන්කර ඇති කටයුත්ත සඳහා පමණක් එය භාවිතා කළ යුතු වේ.

කිසිදු තැනැත්තෙකු විසින් කිනම් හෝ බිම් කොටසක් හෝ ගොඩනැගිල්ලක් සංවර්ධන බලපත්‍රයෙහි සඳහන් කාර්යයක් හැර වෙනත් කාර්යයක් සඳහා භාවිතා නොකළ යුතුය.

නව ආගමික ගොඩනැගිල්ලක් ඉදිකිරීමේදී  අදාළ ආගමික කටයුතු පිළිබඳ අමාත්‍යාංශයේ අනුමැතිය  සහ  අදාළ ප්‍රාදේශීය ලේකම්තුමාගේ අනුමැතිය ලබාගත යුතුය. තවද, ආගමික ප්‍රදර්ශන පැවැත්වීම හෝ ප්‍රාදේශීය සභා බල ප්‍රදේශයේ මංසන්ධිය හා මාර්ග දෙපස ඉදිකෙරෙන විවිධ ආගමික ප්‍රතිමා, කුරුස හා වෙනත් සලකුණු සඳහාද මෙම නියමතාව අදාළ වන්නේය.